Vaky ny kariera vatosoa any Jafaro, izay 25 km miala an’Antanimora, any amin’ny faritra Androy. Raikitra, noho izany ny fitrandrahana baranahiny ataon’ireo mpitrandraka. Karazam-bato maro no hita ao amin’izany kariera izany ka anisan’izany ny Corindons. Amin’izao fotoana izao dia efa an-jatony ireo olona midina any an-toerana ary mifindra monina any mihitsy, araka ny vaovao voaray. Najanona avokoa ny asa tany sy ny voly mangahazo sy katsaka efa nahazatra. Mbola vitsy ireo teratany vahiny mitrandraka any amin’ny karieran’ny Jafaro fa ny tena olana eto dia ny fitrandrahana tsy ara-dalàna izay atahorana hahazo laka. Tokony handray andraikitra avy hatrany ny tompon’andraikitra amin’ny fametrahana arofanina raha tiana hizotra amin’ny tokony ho izy ny fitrandrahana any an-toerana satria ho ripaka avokoa ny ala arovana sy  ny tontolo iainana, hahazo vahana ny tsy fandriam-pahalemana ary indrindra eo amin’ny zaza sy ny tanora izay ahiana tsy handeha an-tsekoly intsony.

Laurena Nany