Leo ny halatra lavanila miseho lany any amin’ny faritra Sava ireo fokonolona ka tsy namela nahazo mihitsy. Jiolahy miisa 3 nilanja lavanila halatra amin’ny gony no tra-tehaky ny andrimasom-panjakana ny alin’ny alatsinainy lasa teo, tokony ho tamin’ny 11ora, tany Sambava. Saika hanohitra ny iray rehefa nifanehitra tamin’ireo mpamboly tao Antsahabe, kaominina Soavinandriana ka niharan’ny angaredona avy hatrany, tamin’izay fotoana izay no tafaporitsaka ny roalahy. Notetehan’ireo fokonolona tamin’ny sabatra ny tanany ka tapaka avy hatrany. Toraka izany koa ny lohany izay niloloha ilay lavanila tamin’ny gony izay hatsembohan’ny hafa ka vaky ihany koa. Rehefa ela nampijaliana ilay olon-dratsy dia nanonona ny anaran’ny olona mpandray ny entana ary sambany vao nisy nanao an’izany. Ity farany izay monina ao amin’ny fokontany Besopaka, any Sambava. Nosamborina, ny talata maraina lasa teo, ilay mpividy lavanila halatra ary efa mandeha ny famotorana. Ilay jiolahy kosa indray nentina notsaboina ao amin’ny hopitalibe any an-toerana.