Feom-bala tokana no nipoaka tany amin’ny fokontany Antaniditra, kaominina Antakavao, distrikan’Ankazobe, ny alin’ny alatsinainy lasa teo. Dimy lahy nirongo basy no nandondona tao amin’ny tokantranon’olona iray tao Amboasarikely. Rehefa nanokatra izany ny tompon-trano dia tifitra avy hatrany no nitsena azy. Nipitika iray metatra niala ny varavarana ilay raim-pianakaviana ary maty tsy tra-drano. Nitsoaka avy hatrany vao nahita azy tsy niaina intsony ireo olon-dratsy.

Tsy fantatra mazava hatreto ny anton’ity famonoana ity fa ahiana ho valifaty. Nanambara anefa ireo mpiara-monina aminy fa olona tsy tia rahoraho sady tsotra eny amin’ny mpiara-belona ilay namoy ny ainy. Nidina teny ny mpitandro filaminana nanao ny fizahana ary nanokatra fanadihadiana mahakasika ity vono olona ity.

L.N