Nisesisesy ny hain-trano manerana ny Nosy tao ho ao. Tao anatin’ny iray andro monja dia tsy latsaka ny 150 ny trano lasa lavenona. Ankoatra ny fahamaizana tany Taolagnaro sy Manakara ny andron’ny talata lasa teo, izay namoizana aim-behivavy iray sy naharatrana olona miisa 3 ary naharavana trano an-jatony dia nandravarava ihany koa ny afo mbola ny androtr’io hatrany tany amin’ny fokontany Ambohinorina, kaominina Kiangara, distrikan’Ankazobe, tokony ho tamin’ny 3ora. Tsy latsaka ny roapolo ny trano may kila, araka ny loharanom-baovao avy any an-toerana. Fako nirehitra tao anaty hadivory nampian’ny rivotra no voalaza fa nahatonga ny loza. “Tsy hay na avy  tamin’ inona no nandalovan’ny afo tamin’ny trano iray fa nihitatra izany ka trano tsy latsaka ny roapolo no may. Tsy nisy nahatafavoaka ny entana ny olona ka be dia be izao ireo traboina any an-toerana. Noho izany, miantso vonjy amin’ny tompon’andraikitra izahay”, hoy i Maminirina Roland, mponin’Ambohinorina. Tsy nisy kosa ny aina nafoy na naratra.