Tovolahy iray 27 taona kosa indray no nangatahan’ny fokonolona hanaovana fitsaram-bahoaka, tany Antsirabe, fokontany Fotsiarivo, kaominina Analampotsy, distrikan’i Mananara Avaratra. Tratran’ny olona nangalatra lavanila milanja 8 kg tao amin’ny toerana voalaza etsy ambony izy ny  alatsinainy lasa teo. Nitsoaka avy hatrany ny tenany ka nifanenjehan’ny fokonolona ary niafina tany an-tranon-drafozany. Noteren’ity farany hitolo-batana anefa izy ary nanaiky ihany ka nanantona ny borigady Mananara ny tenany omaly, tamin’ny 8ora maraina. Vao nandre izany anefa ireo fokonolona dia nirohotra namonjy ny borigady nangataka ny hamoahana io mpangalatra io mba hatao fitsaram-bahoaka. Raikitra ny horakorako sy tabataba niaraka tamin’ny kiririoka manoloana ny biraon’ny zandary nitaky ny famoahana ilay tovolahy fa tsy nanaiky lembenana ny mpitandro filaminana. Mba hanaparitahana azy ireo dia voatery nampiasa hery ny zandary amin’ny fampiasana ny “munition d’instruction” ka nipetraka avy hatrany ireo vahoaka. Ilay mpangalatra kosa avy eo nalefa any amin’ny borigady Maroantsetra mba hiarovana ny ainy.

Laurena Nany