Mbola mahazo vahana ny fitsaram-bahoaka eto Madagasikara. Roalahy indray no maty niharan’izany, tany amin’ny distrikan’Ikalamavony, ny alatsinainy lasa teo, tamin’ny 2ora tolakandro. Fanakanana vehivavy roa sy mpianatra roa, tany Marolala, fokontany Imandro, kaominina Mangidy no niantombohan’ny tantara. Avy niantsena tany Mangidy ireo vehivavy ireo no nosakanan’ireo roalahy izay voalaza fa dahalo raindahiny ao an-tanàna. Velona ny hazolava ka nifanenjehan’ny fokonolona izy roalahy ary tsy tratra raha tsy efa tany Ambolomadinika, fokontany Firahinana, kaominina Solila,ao anatin’ity  distrika voalaza etsy ambony ity hatrany. Niharan’ny fitsaram-bahoaka avy hatrany izy ireo vantany vao voasambotra teo am-pelantanan’ny fokonolona. Vokany, naratra mafy ireo olon-dratsy ka nanaraka hatramin’ny ain’izy ireo noho ny fahaverezan-dra be loatra. Taorian’izay dia voalaza fa tonga teny amin’ny toerana nisian’ny loza ny mpitandro filaminana naka ny razana. Natao, omaly ny fizahana rehetra saingy tsy hay hatreto izay mombamomba azy ireo, araka ny angom-baovao voaray.