Mbola tsy sitrana akory ny fery sy ny takaitra navelan’ireo mpamily taksibe tamin’ny famoizana ain’olona am-polony maro vao tsy ela akory dia manao ny ataony sahady indray ireto mpihetraketraka ireto. Nisehoana lozam-pifamoivoizana indray omaly maraina, tokony ho tamin’ny 10ora, teny amin’ny lalana mihazo an’Ankatso iny. Vokatry ny hamamoana teo amin’ny mpamily sy ny mpanampy azy dia nifatratra tamin’ny fiara iray Bmw sy mpitondra bisikileta iray ny taksibe manao zotra 119. Tsy nisy ny aina nafoy fa ilay mpitaingina bisikileta kosa naratra mafy ary potika tanteraka ilay fiara Bmw  mifanandrify amin’ny toeran’ny mpamily.

Nahasorena ny maro teny amin’iny toerana iny ity lozam-pifamoivoizana ity noho ny tsy fitandreman’ireo mpamily hatrany. “Tsy misy vokany ny fanentanana natao sy ny fanasaziana ireo mpamily taksibe. Toa vao mainka aza manapatra ny maha jiolahimboto azy izy ireo. Aiza ve vao amin’ny 10ora maraina dia efa mamo sahady ry zalahy nefa ain’olona maro no entina. Milah entitra ny fanjakana amin’ireo mpitatitra ireo fa raha tsy izany dia ho gaboraraka hatrany ny fiara fitateram-bahoaka”, hoy ny olona iray nanatri-maso ny zava-nisy.

L.N