Taorian’i Toamasina dia nihazo ny anjran’i Moramanga indray ny fiofanana natolotry ny CNaPS izay nanomboka ny alatsinainy teo ary tsy nifarana raha tsy ny alaroabia 11 may. Toerana faha-05 nanaovana ny fiofanana i Moramanga ho an’ity taona 2016 ity. Kendrena ny fandraisana anjaran’ny mpampiasa rehetra satria izy ireo no tompon’ny adidy amin’ny fiarovana ny mpiasa izay tompon’ny zo ara-tsosialy. Ambony ny taham-pahavitrihan’ireo mpiofana raha oharina tamin’ny taona 2012, araka ny fanazavan-dRandrianarijaona Charles Emilson, lehiben’ny sampan-draharaha Sass. Nanaitra sy nampiavaka ny fiofanana ny fisian’ireo mpianatra nalefan’ny tale jeneralin’ny Fanalamanga mba hiofana. Andiany Mamiratra ireo mpianatra ireo, izay vao nahavita fianarana momba ny fitantanana ara-bola (na comptabilité).

Nazava tanteraka tamin’ireo mpiofana ny karazana fanampiana omen’ny CNaPS ny mpiasa nandritra ny fiofanana dia ny fanampiana ny fianakaviana, ny fanampiana raha tra-doza sy marary vokatry ny asa ary ny fisotroan-dronono. Tsy mahazo izany anefa ny mpiasa sy ny vady aman-janany raha tsy manefa ny adidiny ny mpampiasa. Nanamafy izany rahateo ireo mpampiofana avy amin’ny Sass ary nilaza fa « ny fiahiana ara-tsosialy dia andraikitry ny rehetra » ka ireto mpiofana ireto no ho ambasadaoron’ny CNaPS hizara amin’ny mpiara-belona aminy ny fahalalana azo mba hananan’ny olona ny fizakana ny zo ara-tsosialy ka tsy tokony hisy very zo, ary hitombo isa ny Malagasy hizaka ny zo sy ny fiahiana ara-tsosialy.

Nangonin’i L.N