Mahazo vahana tanteraka ny fanolanana sy fanodinkodinana zaza tsy ampy taona, any Marovoay. Nanomboka tamin’ny volana janoary no makaty dia efa maherin’ny folo any ho any ireo zaza niharan’izany hetraketraka izany, araka ny tatitra azo avy amin’ny tompon’andraikitra iray miadidy ny kaomisaria any an-toerana. Ireo zazavavy manodidina ny 12 hatramin’ny 13 taona no tena lasibatra ny fanolanana raha toa ka ireo amin’ny salan-taona 15 kosa no iharan’ny fanodinkodinana. Vao tamin’ny herinandro lasa teo, tovovavy iray no nisy nanolana, tany amin’ny fokontany Mandrosoa, izay 12 km miala ny tanànan’i Marovoay. Nitaraina ny voina nahazo azy avy hatrany ilay zaza ka raikitra ny fitadiavana ilay nahavanon-doza. Tsy lasa lavitra anefa dia tratran’ny fokonolona izy ka noentina tany amin’ny mpitandro filaminana saingy efa nanaovan’ny olona fitsaram-bahoaka izy talohan’izany. Hatreto dia efa betsaka ireo mpanolana no voalaza fa naiditra am-ponja raha ny any Marovoay no asiana resaka fa ity tratra farany ity no mbola notazomina ao amin’ny biraon’ny polisy noho ny, fitokonan’ireo mpandraharaha ny fonja. Ny tena olana any an-toerana anefa  araka ny loharanom-baovao dia  manaiky  ny raharaham-pihavavana ny  ray aman-dren’ireo zaza niharan’ny herisetra satria onerana vola be na omby ny fahavoazana.

Laurena Nany