Mirongatra tsy misy ohatra izany ny hetraketraka ataon’ireo andian-jatovo tsy ampy taona, any an-tampon-tanànan’i Mahajanga, tato ho ato. Saika ho isan’andro  no andrenesana fitarainana momba azy ireo mahakasika ny fanakanan-dalana sy fanafihana izay tratra alina. Tovolahy eo amin’ny 13 ka hatramin’ny 17 taona eo izy ireo, izay mandeha amin’ny andiany 20 mahery. Toy ny tranga niseho ny alahady lasa teo, tamin’ny 7ora sy sasany alina. Tanora efa-dahy avy nitsangatsangana teny amoron-dranomasina nandalo teny akaikin’ny Banja Toalaza nihainohaino ny fampisehoana nataon’i Barinjaka sy Black Nadia no lasibatra tamin’io fotoana io. Nobahanana sady notampenan’izy ireo ny lalana fivoahana ary niainga niaraka tamin’izay ny daroka. Tsy vitan’izany fa mbola noterena hanome ny fananany ireo voatafika.

Taloha kelin’io indray, tovolahy iray hafa avy naka aina teny amin’ny Bord no lasibatra. Mody nangataka sigara izy ireo ary norarafana kapoka fehikibo avy hatrany ny tarehiny rehefa tsy nanome, araka ny fampitam-baovao voaray. Tokony ho mailo, araka izany, ireo mponina any Mahajanga, indrindra ireo mpandeha amin’ny alina. Araka ny feo mandeha hatrany mantsy dia tsy ialana fitaovana maranitra ireo andian-jatovo mpihetraketraka ireo.

Laurena Nany