Notanterahana, omaly 19 may, teny amin’ny sekoly ambonin’ny Polisim-pirenena manofana ho kaomisera sy ofisie eny Ivato ny lanonana famindram-pibaikoana hifehy ny sekoly teo amin’ny tale teo aloha dia ny contrôleur général Tafeno Rolly Aimé sy ny tale vaovao Tran Guy. Nitarika ny lanonana tany an-toerana ny minisitry ny filaminam-bahoaka, kaomisera divizioneran’ny polisy, Anandra Norbert sy ireo delegasionina mpiara-dia aminy. Tonga tany an-toerana ihany koa ny minisitra teo aloha sy ireo olo-manan-kaja sivily ary miaramila ao amin’ny fivondronan’Ambohidratrimo. Nandritra ny fandraisam-pitenenana nataon’ny minisitra dia notsiahiviny fa anisan’ny laharam-pahamehan’ny polisy ny ady amin’ny fahantrana sy ny tsy fandriam-pahalemana ary ny fanondranana an-tsokosoko ny harem-pirenena. Nohamafisiny ihany koa fa mbola vain-dohan-draharaha hatrany ny ady amin’ny kolikoly izay tsy afa-misaraka amin’ny fanajana ny fitsipi-pifehezan’ny polisim-pirenena. Tsy tontosa anefa izany rehetra izany hoy hatrany ny tenany raha tsy miainga any ifotony dia ny eo anivon’ny sekoly. Koa niarahaba sy nitso-drano ny tale vaovao Tran Guy izy mba hahavita be amin’ny adidy lehibe miandry azy.