Raha nangingina teo aloha teo ny resaka fanendahana ao amin’ny tsenan’i Mahamasina, isaka ny alakamisy, noho ny fahafantaran’ireo jiolahy ny hetsika ataon’ny polisy dia miverina mahazo vahana indray izany amin’izao fotoana izao. Mahatratra 8 ka hatramin’ny 10 any ho any ireo mpanendaka sarona isaka ny tsena, araka ny tatitra azo avy amin’ny polisin’ny boriborintany faha-5, eny Mahamasina. Raha ny alakamisy lasa teo izao dia tovolahy mpanendaka miisa 4 no voasambotra mandra-pahatonga tamin’ny 12ora antoandro. Telo tamin’izany no nosamborin’ny olona ary naterina teny amin’ny mpitandro filaminana raha toa ka tratran’ny miaramila ambodiomby nanendaka mpiantsena kosa ny iray, tokony ho tamin’ny 12ora mahery kely teo ho eo. Novelesin’ity miaramila tamin’ny kiho indray mandeha ilay olon-dratsy ary voa teo amin’ny orony ka nandeha ra. Ilay zavatra nangalariny kosa natolotra ny lasibatra. Araka ny tatitra azo hatrany dia olona vaovao avokoa ireto tratra ireto.

Laurena Nany