Mpanao sinto-mahery gaigilahy indray no tra-tehaka ny mpitandro filaminana. Manoloana ny firongatry ny asa fanendahana sy ny harom-paosy ary ny sinto-mahey eny amin’ny faritra Analakely sy ny manodidina dia nandefa polisy manao fanamiana sivily, ny polisy avy ao amin’ny boriborintany voalohany, mba hanara-maso ireo mpanao ity asa ratsy ity. Nandritra izany no nisamborana ireo olon-dratsy. Ny talata 18 mai, tokony ho tamin’ny 10ora maraina no nitrangan’izany, teny Analakely. Teo am-pisintomana findain’olona indrindra ny jiolahy iray no tratra. Tamin’ny famotorana natao azy no nanoroany ny namany mpiaraka manao sinto-mahery aminy ka enin-dahy indray no sarona teny Soarano sy Anosy ary Paraky ny andron’iny ihany rehefa nanaovana velam-pandrika. Nandritra ny fanadihadiana indray no nahalalana fa efa tena mpamerin-keloka ny roa ary efa nigadra teny Antanimora. Omaly no natolotra ny fampanoavana izy fito mirahalahy ireo.