Nahery vaika ny fifandonana teo amin’ny mpitandro filaminana sy ireo dahalo, ny zoma lasa teo, tany Ankazobe. Nandritra ny fifampitifirana izay naharitra adim-pamataranandro maromaro teo amin’ny roa tonta dia dahalo rain-dahiny miisa 4 no lavon’ny balan’ny zandary. Vokatra azo tamin’ny vaovao avy amin’ny fiarahamonina, tamin’ny alakamisy teo, izay nilaza fa misy olon-dratsy mampihorohoro, ao Ambodivona. Nidina tany an-toerana avy hatrany ny mpitandro filaminana ny ampitson’io. Vaky nandositra ireo dahalo raha vao nahatazana ny fahatongavan’izy ireo. Nisy ny fanarahan-dia nihazo ny Andavatsaha tonga hatrany Iarehana ka raikitra ny fifandonana tao Antampoketsa, izay mbola any amin’ny distrikan’Ankazobe ihany, izay nahafatesana ireo malaso efatra. Dahalo iray ihany koa no voatifitra nandritra ny sakoroka saingy mbola tafatsoaka niaraka tamin’ireo namany.

Mandry tsy lavo loha ny mponina any amin’ny distrikan’Ankazobe, noho ny afitsok’ireo dahalo mampihorohoro, mandroba fananana ary mbola mahavita mamono ihany koa. Araka ny tatitra avy amin’ny mpitandro filaminana dia ireto andian-dahalo ireto no ahiana ho tompon’antoka tamin’ny vono olona izay niseho tao Antakavana Ankazobe andro vitsy lasa izay. Natolotra ny fitsarana ny raharaha ary mitohy ny fanadihadiana.

Laurena Nany