Raikitra ny fifandonana teo amin’ny fokonolona sy ny miaramila, tany Amparafaravola. Fisavana tranon’olona iray tany an-toerana no fantatra fa nahatonga ny sakoroka, ny fiandohan’ny herinandro teo. Araka ny vaovao voaray, nahazo iraka hanao fisavana ny tranon’olona iray any amin’ny tanànan’Ampitsarana, kaominina Andrebakely, ny miaramila. Tsy nanaiky izany anefa ireto hosavaina, ka teo no niandohan’ny disadisa. Niafara tamin’ny fifamaliana teo amin’ny roa tonta mantsy ny raharaha ary tsy nijanona teo fa tonga hatramin’ny fifampikasihan-tanana mihitsy. Tsy izany ihany fa mbola nalain’ireo olona ihany koa ny fitaovam-piadiana teny aminy. Tratran’ny be no ho vitsy ka nampiantso ireo namany mba hanampy azy ilay miaramila fa vao mainka aza nihamafy ny fifandonana. Vokany, olona roa naratra, iray avy amin’ny fokonolona raha toa ka kapôraly ny faharoa. Olona efatra ihany koa no voasambotra. Tafaverina amin’ny tompony kosa ilay fitaovam-piadiana.

L.N