Nisokatra ny alakamisy 26 may ary hifarana androany sabotsy 28 may, tany Fenoarivo-Atsinanana, ny tsenaben’ny tantsaha nitondra ny anarana hoe : “Foara Tegnandraha andiany faharoa”. Foara natao hampahafantarana ireo vokatra ara-pambolena sy asa tanana mba hanomezan-danja ireo tantsaha mpamokatra any amin’ny faritra Analanjirofo. Ho an’ireo komity mpikarakara, ny hahafahan’ireo tantsaha sy ireo mpanao asa tanana mampiseho ireo vokatra ho amin’ny sehatra matianina no maha zava-dehibe ny fisiany satria io no fotoana natao hihaonan’ireo mpamokatra sy ny mpanangom-bokatra. Nisongadina nandritra ny foara, noho izany ny fifanankalozan-kevitra sy dinik’asa ho fanatsarana ny vokatra. Nanamarika ny hetsika ihany koa ny varotra fampirantiana teo anoloan’ny araben’ny fahaleovantena any Fenoarivo-Atsinanana. Tompo-marika tamin’ity tsenabe ity ny Antenimieran’ny Varotra Analanjirofo, ny tetikasa Prosperer, ny faritra Analanjirofo ary ny kaominina Fenoarivo-Atsinanana.

L.N