Nisehoana lozam-pifamoivoizana namoizana ain’olona, tany amin’ny distrikan’i Manakara. Tany Vohitromby, kaominina Morarano no nitragan’izany, ny alakamisy maraina lasa teo, tamin’ny 8ora. Vehivavy iray namonjy ny zanany vavy kely niampita tampoka ny arabe no voalaza fa nahatonga ny loza. Satria tamin’io fotoana io no nisy fiara marika Land Rover nandalo nentin’ny lehilahy iray, izay nitondra mpandeha efatra avy any Analavory ho any Sahasinaka. Nandeha mafy ilay fiara araka ny vaovao voaray ka na niezaka niala ilay mpamily aza izy mianaka dia tsy tafajanona intsony fa efa akaiky loatra. Vokany, niara-voadona izy mianaka saingy maty teo no ho eo ilay renim-pianakaviana. Ilay zazavavy kely kosa naratra mafy ary nentina nihazo ny toeram-pitsaboana. Olona roa tao anatin’ilay fiara ihany koa no voalaza fa naratra mafy ka samy nentina any amin’ny hopitaly avokoa. Nidina teny an-toerana ny zandary nanao ny fizahana. Mandeha ny fanadihadiana.

Laurena Nany