Raha nangingina ny halatra ity asa ratsy ity sy ny fahenoana vaky fasana dia mitady hirongatra indray izany ankehitriny. Olona roalahy no fantatra fa eo am-pelantanan’ny zandarimariam-pirenena amin’izao fotoana izaonoho ny fahatratrarana taolam-paty. Tany amin’ny fokontany Antanambao, kaominina Talata-Volonondry no nahatratrarana azy ireo nandritra ny fisafoana nataon’ny mpitandro filaminana, ny alakamisy lasa teo, tamin’ny 5ora sy sasany hariva. Nilanja gony hihazo ny renivohitra izy roalahy no nosakanan’ny manam-pahefana noho ny fihetsika mampiahiahy nasehon’izy ireo.  Rehefa natao ny fisavana ny entana nentin’izy ireo dia tsikaritra fa taolam-paty no tao anatiny ary taolan-dava avokoa ny ankamaroany izay milanja 11kg. Nosamborina avy hatrany izy roalahy ary nentina nihazo ny biraon’ny zandary hatao famotorana. Nandritra ny fanadihadiana natao dia nilaza izy ireo fa  saika hoentina hamidy aty an-drenivohitra ireo taolana ireo saingy tsy nety nilaza ny toerana misy ny fasana novakiana izy ireo na ny anaran’ny olona mandray ny entana. Mbola tsy naharay fitarainana mahakasika fahavakisana fasana any amin’iny manodidina iny ihany koa anefa ny zandary hatramin’izao. Misokatra ny fanadihadiana.

Laurena Nany