Rehefa nanjavona tao anaty andro vitsivitsy ny ankizilahy kely miisa 2 monina eny Ambohidratrimo dia hita ihany ny sabotsy lasa teo. Marihina fa nisy naka an-keriny izy ireo tamin’ny fotoana tsy nahitana azy. Araka ny vaovao voaray, andian-jiolahy maromaro no niara-nisambotra ireo ankizy ireo teny amin’ny trano fonenany, ny herinandro lasa teo. Notaomin’izy ireo hanaraka azy ireo zaza dia lasa. Ny ankizy hafa niaraka nilalao tamin’izy ireo no nahalalana fa lasa nanaraka ireo olona ireo izy mirahalahy. Nampandre ny mpitandro filaminana avy hatrany ny ray aman-drenin’ireo zaza very ka taorian’ny fanadihadiana nataon’ny manodidina dia niditra tamin’ny fikarohana izy ireo.

Ny sabotsy lasa teo, tamin’ny 10ora alina, teny Ankadikely Ilafy, manakaiky ny fivarotan-kazo no nahitana azy ireo tao anatin’ny fiara tsy mataho-dalana iray nipetraka teo amoron-dalana. Tsy nisy nanimbinana fa salama tsara avokoa izy ireo. Mbola tsy fantatra kosa ireo mpangala-jaza na ny antony nakana azy ireo. Mitohy ny fanadihadiana sy ny fikarohana ataon’ny zandary ireo olon-dratsy.