Ny alatsinainy lasa teo no niakatra Fitsarana ireo jiolahy tratra nanafika teny amin’ny fokontany Mahabo, kaominina Andoharanofotsy ny zoma lasa teo, tokony ho tamin’ny 1ora maraina. Raha efatra mianadahy izy ireo no sarona tamin’iny fotoana iny dia efa tafakatra enina izy ireo no niatrika ny Fitsarana. Taorian’ny fihainoana azy ireo, notanana vonjy maika eny Tsiafahy  ny dimy lahy ary ao Antanimora kosa ilay vehivavy. Raha tsiahivana dia telo lahy nirongo sabatra sy antsy ary “pince coupante” no nanafika tokantrano roa sy fiangonana tamin’io alina io. Lasan’izy ireo ny  volamena sy vola ary “synthétiseur” tao amin’ny tokantrano voalohany, raha toa ka niala maina tao amin’ny roa farany. Nampandre ny mpitandro filaminana avy hatrany mantsy ny lasibatra ka tsy niandry ela ireto voalohany nidina teny an-toerana niodidina ny tanàna voatafika. Rehefa nokarohina nandritra ny ora roa dia voasambotra ny iray ary tamin’ny alalan’ny famotorana azy no nahafahana nisambotra ireo namany sisa.

L.N