Nisy ny fanaovana “titre” faobe ny ministeran’ny fanajariana ny tany sy tetik’asa ny filoham-pirenena ary fampitaovana tany Ambatolaona sy Manjakandriana. Tsy nisy ny filazana tamin’ny haino aman-jery sy ny fanazavana mahakasika ny fanatanterahana izany fa ny Ben’ny tanàna no nilaza fa izay manana vola 70 000 ariary miampy ny sakafon’ny mpandrefy no afaka manao ka hivoaka tsy ho ela ny “titre”. Rehefa tonga anefa ny fotoana nanaovana izany dia ireo mpiana-draharaha ao amin’ny fandrefesan-tany notronin’ny Pcc (Président conseillère commercial) no nanao ny asa ary mbola nomena 5 000 ariary indray.

Tsy nijanona teo fa mbola nitaky vola 35 000 ariary isaka ny vakim-paritra ny Ben’ny tanàna hanaovana fangatahana. Taorianan’izay dia mbola namory olona indray ity farany fa tsy maintsy vidiana ny tany ary ariary dimy ny metatra toran-droa izay vinavinaina omena ny sampandraharaha ny fananantany. Niovaova teny any ny vola nalaina tamin’ireo vahoaka ary raha atambatra dia eo ho eo amin’ny arivo vaki-paritra isa ary manodidina ny 20 000 Ha ny velaran-tany ka vola amina miliara maromaro no mihodina amin’izany.

Manahy noho izany ireo vahoaka fa misy resaka fanodikodinam-bola ao anatin’io ary mangataka ny hamerenana ny volam-bahoaka ireo mponina fa ny “Titre” faobe dia fanjakana foibe no manokana vola ho fanantanterahana azy. Araka ny fanambaran’ny solontenan’ireo fokonolona dia efa nisy ny fitarainana natao ary efa am-pelatanan’ny Bianco ny raharaha.

L.N