Mitohy hatrany ary vao maika mahery vaika ny fitsaram-bahoaka teo amin’ny firenana. Nanomboka ny faran’ny herinandro dia efa olona dimy izay no niharan’ny hatezeran’ny fokonolona tamin’ny toerana samihafa. Ankoatra ireo efa-dahy miady aina mafy any Toamasina dia lehilahy iray kosa no namoy ny ainy, tany amin’ny distrikan’Antanifotsy. Tratran’ny olona teo ambaravaran’ny tokantrano iray, tany Mahatazana, fokontany Ambonivary, kaominina Ampitatafika, nikasa hamaky trano ilay jiolahy ny alin’ny 6 jiona teo, tamin’ny 9ora sy sasany. Tsy nisy alaharo alaharo intsony fa nihatra avy hatrany ny fitsaram-bahoaka. Raikitra ny totohondry sy daka ary daroka nahazo ilay olon-dratsy. Tsy nijanona teo fa mbola nototan’izy ireo biriky dia nodorana tamin’ny hazo avy eo. Tsy izay ihany fa mbola nalonan’ireo fokonolona tao an-tanimbary mbola misy rano indray izy ka sempotra ary nitarika ny fahafatesany. Efa maraina ny andro vao nisy nampandre ny mpitandro filaminana ka nidina teny nanao ny fizahana niaraka tamin’ny dokotera. Mitohy ny famotorana.

Laurena Nany