Ny 10 jona lasa teo no notanterahina tany Maroantsetra ny atrikasa momba ny lavanila ao anatin’ny faritra Analanjirofo, izay nandraisan’ireo mpisehatra rehetra amin’ny famokarana, fikirakirana ary ireo mpanangom-bokatra. Fotoana izay nandraisan’ireo mpisehatra fepetra hentitra mahakasika ny paikady entina hiadiana amin’ny halatra. Tafiditra ao anatin’izany ny fikarakarana taratasy amin’ny fividianana ny vokatra. Nofaritana koa ireo arofanina amin’ny fikajiana ny kalitaom-bokatra ka ho apetraka isaka ny fokontany sy ny kaominina ireo paikady. Nandritra ity atrikasa ity ihany koa no nametrahan’ireo mpisehatra ny daty hanokafana ny taom-piotazana lavanila 2015-2016, ka ny 12 jolay ho avy izao no hanaovana izany. Miankina amin’ireo tompon’andraikitra eo anivon’ny faritra Analanjirofo sisa ny ivoahan’ny daty ofisialy.

Mampalahelo anefa ny zava-miseho any an-toerana amin’izao fotoana izao fa araka ny fitarainan’ny mponina dia efa tsy ahitana voany intsony eny ampotony. Manahy  amin’ny mety hoavin’ny famokarana lavanila izay mampalaza an’i Madagasikara izy ireo.

Laurena Nany