Olona miisa 3 indray no sarona niaraka tamin’ny rongony 44 gony tao anaty fiara marika Mazda. Ny faran’ny herinandro lasa teo, tamin’ny 7ora sy sasany hariva no nahatratrarana izany, teny amin’i By pass Androndrakely, rehefa naharay antso avy amin’ny olon-tsotra ny polisy misahana ny ady amin’ny zava-mahadomelina. Nanambara ny loharanom-baovao fa misy fiara “mini-bus” iray mitatitra rongony  maromaro avy eny Iavoloha ho any Ifarihy tamin’io hariva io. Nidina teny an-toerana avy hatrany ny mpitandro filaminana nanao ny vela-pandrika ka telolahy no voasambotra tao anatin’ilay Mazda ary mpamily ny iray. Rehefa nosavaina ilay fiara dia ireo tokoa ny rongony miisa 15 gony. Tamin’ny fisavana ny tranon’izy ireo tany Ifarihy indray avy eo no nahatratrarana rongony 29 gony. Tamin’ny famotorana natao azy ireo no nilazan’ilay mpamily fa 50 000 ariary no karamany nitatitra ireo rongony ireo. Ny roa hafa kosa nilaza fa mpitahiry sy mpanaparitaka ireo entana ireo eto an-drenivohitra. Nilaza ihany koa izy ireo fa avy any atsimon’i Nosy no fiavian’ireo entana ireo. Natolotra ny fampanoavana omaly ny raharaha.

L.N