Nahitana fihenana indray ireo mpanendaka any an-tampon-tanànan’i Toamasina. Nandritra ny fisafoana nataon’ny polisy avy any amin’ny fokontany Tanambao I, ny alin’ny sabotsy lasa teo dia mpanendaka telolahy no indray sarona, teny amin’ny faritra Barikadimy, tamin’ny 11ora sy sasany. Vaky nandositra ireo mpanao ratsy raha vao nahita ireo mpanao fisafoana ka raikitra ny fifanenjehana. Tsy lasa lavitra anefa dia tratra daholo niaraka tamin’ny sabatra lavalela entin’izy ireo manao ny asa ratsy sy fonosan-drongony maromaro. Nentina avy hatrany tany amin’ny biraon’ny polisy natao fanadihadiana ireo olon-dratsy ka nandritra izany no nahalalana fa mpikambana ao anatin’ny “bande de 15” izy ireo. Marihina fa ny “bande de 15” dia tsy vitan’ny manendaka ihany fa mamaky trano ihany koa ary isan’ireo fikambanan-jiolahy ikoizana any an-tampon-tanànan’i Toamasina. Marihina fa tsy ampy taona ny roa amin’ireo jiolahy, izay samy 17 taona avokoa.