Ho fanakaikaizan’ny vahoaka ny toeram-piterahana dia notokanana tamin’ny fomba ofisialy ny zoma 10 jona lasa teo, ny Hopitaly kely any  Mahavelonkely, distrikan’i Fenoarivo-Atsinanana. Marihina fa efa ela no nisian’ity Hopitaly kely tany an-toerana ity ary mandray anjara mavitrika amin’ny fikarakarana reny sy ny zaza saingy tsy misy efitrano fiterahana. Izay antony izay no nananganana efitrano fiterahana ho fampiharana ny politikan’ny ministeran’ny Fahalasaman-bahoaka, noho ny fahatsapana fa mbola maro amin’ireo vehivavy bevohoka no tsy manantona toeram-piterahana. Amin’izao fahazoan’ny mponina Mahavelonkely efitrano fiterahana izao dia entanina ny vahoaka ary indrindra ireo vehivavy mitoe-jaza mba hanantona ny hopitaly hatrany mandritra ny fotoana rehetra hitondrana vohoka sy hiterahana mba hanamorana sy hampizotra ny fiterahana araka ny tokony ho izy.

L.N