Tovolahy roa mpiraitampo no tratran’ny polisy misahana ny sisintany tany amin’ny seranam-tsambon’i Taolagnaro, ny alarobia lasa teo. Vao 20 taona ny zokiny ary 14 taona kosa ny zandriny, teratany Tanzanianina izy ireo. Araka ny fanazavan’ny mpitandro filaminana, mpitsoa-ponenana an-tsokosoko izy ireo satria tsy nahitana taratasy mazava sy fahazoan-dalana miditra eto Madagasikara. Rehefa nanaovana fanadihadiana anefa dia tsy mety milaza ny antony nitsoahan’izy ireo ny firenena Tanzania sy ny fomba nahatongavan’izy ireo teto an-toerana. Notazomina ao amin’ny biraon’ny polisy Taolagnaro izy roalahy ireo ary ny fidirana tsy ara-dalana eto Madagasikara no hanamelohana azy ireo. Mitohy ny fanadihadiana.