Tsy milamina ny distrikan’Ankazobe manoloana ireo asan-dahalo mifanesy any an-toerana. Saika ho isan’andro dia isehoana fanafihan-dahalo foana na miezaka mampandry fahalemana aza ireo mpitandro filaminana, araka ny fitarainan’ny mponina avy any an-toerana. Any amin’ny ilany Atsinanana avaratra, izay ahitana ny kaominina Antakafana sy Ambolotarakely no voalaza fa tena anjakan’ny asan-dahalo. Tao anatin’ny 3 herinandro izay dia tanàna maromaro ao anatin’ireo kaominina ireo no lasibatr’ireo olon-dratsy mirongo basy ireo. Omby 94 isa no nanjavona nandritra izany ary ny 74 isa tany Marodaza Atsinanana raha toa ka 20 ny tany Ambohimanjaka. Olona iray kosa no namoy ny ainy tamin’ny fanafihana nitranga tany Ambohimiakatra ary omby tsy voafaritra isa no lasibatra. Manoloana izany rehetra izany dia mandry tsy lavo loha ny mponina ary mangataka ny fametrahana « Détachement autonome de sécurité » na Das eny anivon’ny distrikan’Ankazobe ny mponina.

L.N