Voasoroka ara-potoana ny fanafihan-dahalo tany amin’ny distrikan’i Miandrivazo. Sendra ny patsa iray tsy omby vava ireo mpangalatra, ny alin’ny zoma hifoha sabotsy lasa teo. Dahalo miisa 15 no nifanehitra tamin’ny mpitandro filaminana manao fisafoana, tany ampitan’ny rano Mahajilo ny alin’io. Ahiana ho dahalo saika handeha hanao fanafihana izy ireto. Nanapoaka basy avy hatrany ireo olon-dratsy vantany vao nahatazana ireo zandary saingy tsy nihemotra mihitsy ireto farany. Raikitra noho izany ny fifampitifirana teo amin’ny roa tonta, izay naharitra adim-pamataran’ora maromaro. Voan’ny balan’ny mpitandro filaminana nandritra izany ny iray tamin’ireo mpangalatra ka nilavo lefona nanoloana ny mpifanandrina taminy. Vaky nandositra nitondra ny namany naratra ireo dahalo ka tavela teo ny sakaosy iray. Rehefa nosavana izany, moara be dia be entin’izy ireo manatanteraka ny fanafihana mitam-piadiana no tao anatin’izany. Mitohy ny fanadihadiana.

Laurena Nany