Sendra ny nahay azy ny mpanendaka iray tratran’ny fokonolona, teny Andavamamba, ny andron’ny sabotsy teo. Tsy namelan’ny olona mihitsy raha tsy nahazo ny sahaza azy. Tra-tehaka nangalatra finday ka raha vao nitabataba niantso vonjeo ny lasibatra dia tonga avokoa ny fokonolona. Nirifitra nandositra ilay olon-dratsy saingy tsy lasa lavitra dia tratra. Nifandritahan’ny fokonolona amin’izay izy ka samy namely avokoa izay nandalo. Tao ireo nidaroka sy nandaka ary namely totohondry ka nalemy hatramin’ny lohalik’ilay jiolahy. Vokany, tsy afaka namindra intsony izy. Tsy nionina tamin’izay ihany anefa ireo vahoaka efa leo ny tsy maty manotan’ireto mpanendaka ireto fa naboridan’izy ireo koa ity farany ka takon-kenatra sisa. Vao nesorina anefa ny akanjony dia niparitaka teo amin’ny tany avokoa ireo finday rehetra nangalariny. Rehefa afa-po namono azy ny fokonolona dia notaritina nihazo ny biraon’ny polisy ilay jiolahy. Efa eo ampelatanan’ny mpitandro filaminana ny raharaha.

Laurena Nany