Miditra amin’ny andiany faharoa ny Festival des baleines Sainte-Marie tamin’ity taona 2016 ity. Haharitra sivy andro izany, dia ny sabotsy 2 ka hatramin’ny alahady 10 jolay. Sivy andro isian’ny hetsika ara-javakanto, fanatanjahantena ary hetsika ara-kolontsaina. Toy ny diabe natao tamin’ny fanokafana izany « festival » izany dia hisy seho toy izay koa amin’ny famaranana. Diabe izay manam-porofo ny maha ivon-toeran’ny kolontsaina sy fizahantany an’i Sainte Marie. Voafintina nandritra io fotoam-panofakana ny lanonana io ireo kolontsaina mampiavaka an’i Nosy Boraha. Naseho ny momba ny tantaran’ireo piraty. Ny nanaovan’ny mpanjakavavy Betty zanaky ny mpanjaka Ratsimilaho mariazy tamin’i La Bigorne teratany frantsay ka nahatonga an’i La Frantsa sy Sainte-Marie, rano sy vary izay nahalasa Antenosy maro nizaka zom-pirenena frantsay . Ankoatra izay dia naseho ireo fomba amam-panao Antenosy toy ny fangataham-bady, ny fomba fikarakarana sakafo, ny fambolena, ny anjara toeran’ny tsolabe (baleine) eo amin’ny Antenosy. Fa ny hampiavaka ity lanonam-pamaranana ity kosa dia ny lalao izay hataon’ny ekipa nasionaly Barea Beach Soccer sy ireo avy atsy amin’ny Nosy La Réunion. Anisan’ny fifaninanana andrasan’ireo mpanatrika ihany koa ny « Miss », izay  hatao ny alin’ny zoma. Ary Julien Lepers kosa no hanentana ny fotoana mandritra ny filatroana rehetra amin’izany « Miss » izany.

L.N