Nitrangana haintrano mahery vaika tany Ankify, amin’ny seranana mampitohy an’Ambanja sy Nosy-Be (Hell-Ville), any amin’ny distrikan’Ambanja, ny alatsinainy tamin’ny 11ora sy sasany antoandro. Tsy fantatra mazava ny antony fahavoazana fa ahiana ho afo kitay nandrahoana sakafo no nahatonga izany satria amin’ny fotoana fikarakarana mihitsy no nitranga ny loza. Ny trano rahateo vita amin’ny hazo ka vetivety dia niredareda ny afo ary niparitaka teo amin’ireo trano mifanila vodirindrina. Marihina fa tsy misy mpamonjy voina any an-toerana ka ireo mponina ihany no niezaka nifanome tanana namono ny afo. Noho ny fitsokan’ny rivotra mafy anefa dia nananosarotra ho azy ireo ny fifehezana ny fahamaizana. Naharitra ora maromaro vao voafehy tanteraka ny afo, araka ny fampitam-baovao voaray. Vokany, trano fonenana miisa 3 no kila forehitra. Tsy nisy kosa ny aina nafoy na naratra fa tombanana ho an-tapitrisa ny zavatra may.