Olana ara-tokantrano ! Io no heverin’ny mpanao fanadihadiana ho antony nahatonga ny ramatoa iray hamono tena teny amin’ny ranon’Ikopa vao tsy ela akory izay. Mbola hita teny aminy mantsy ny taratasy saro-pady mahakasika ny tokantranony sy ny fianakaviany. Anisan’izany ny kopian-janany sy ny taratasy manamarina ny mariaziny. Tsy nahitana ratra na mangana ny vata-mangatsiakan’ilay ramatoa ka izay no nilazan’ny mpanao famotorana fa namono tena izy. Ireo taratasy teny aminy ihany koa dia toa maneho fa saika hoentiny manaraka azy any amin’ny varo tsy mifody satria tokony ho simba tao anaty rano raha tsy nisy nahita.

Tsy tranga vaovao ny toy izao fa mateti-pitranga. Taratry ny fahantrana sy ny fahoriana satria mafy loatra ny vesatra mianjady amin’ny isam-batan’olona ka mahatonga ny sasany tsy hahazaka intsony ny fiainana ka mifidy ny hanapitra ny andro amin’ny alalan’ny fitsorahana any anaty rano na ny fisotroana poizina. Ny tena mahagaga dia ny tanora mbola afaka mitraka sy miavotra amin’ny fiainana no tena maro an’isa amin’ny famoizam-po ka lasa manaonao foana miroso amin’ny famonoan-tena. Tsy ny vehivavy irery no lasibatr’izany fa ny lehilahy ihany koa indrindra indrindra.

Dom