Raha ny tarehimarika farany dia dahalo 5 tamin’ireo nanafika ny fiara Bilomaza tany Betroka no efa voasambotry ny mpitandro filaminana. Jiolahy miisa 3 hafa, iray tarika amin’ireo ihany koa no efa maty voatifitra. Mitohy ny famotorana sy fanenjehana ary efa nampanantena ny tompon’andriakitra fa tsy hijanona ny hetsika raha tsy rava tanteraka ity andian-dahalo nahafaty olona miisa 32 ity. Efa nibaradaka rahateo ireo voasambotra ary nanoro ireo mpiray tsikombakomba saingy eo amin’ny fisamborana no mbola mahataraiky satria nilefa any anaty ala ny ankamaroan’ireo olon-dratsy. Raha ny vaovao azo avy any an-toerana dia somary nilamindamina any Betroka sy ny manodidina taorian’ny fetin’ny 26 jona satria marobe ireo mpitandro filaminana nalefa any an-toerana. Matahotra ihany ireo dahalo rehefa sendra ny mahery noho izy ary resa-be sy tsy mandaitra akory ny moara sy ody basy isehosehoan’izy ireo.

Dom