Rapa tanteraka ary zara raha nisy namantarana azy sisa ny tovolahy iray voalaza fa tratra ambodiomby teo am-pangalarana moto teny Ambatobe. Nosamborin’ny olona izy ary tratran’ny fitsaram-bahoaka ara-bakiteny. Nivonto avokoa ny tarehiny manontolo, ny maso ilany aza saika nipotsaka ary ny molotra sy ny orona nivindina be noho ny totohondry nahazo azy. Nilaza fa avy eny Ankazomanga io mpangalatra moto io izao nanafika hatreny Ambatobe izao. Tsy misy hamantarana azy ho jiolahy mihitsy satria talohan’ny nahatrarana azy dia mba miendrika zanak’olona manana ny maha izy azy ihany ilay mpangalatra. Madio sy tsara fitafiana toy ireny tanora mpianatra eny amin’ny lisea na oniversite ireny mihitsy ny fijery azy. Tsy misy tandroka ny ratsy ary matetika dia ireo zanaky ny manan-katao no tena mivaro-lavo amin’ny ditra sy ny halatra hoy ny filazan’ny mponina teny amin’ny manodidina. Raha teny amin’ny fokontany hafa mafampana io jiolahy io efa matin’ny fitsaram-bahoaka hoy ireo nanatri-maso.

Dom