Nisondrotra hatramin’ny Ar 5 000 ny litatry ny lasantsy any Vondrozo efa hatramin’iny herinandro lasa iny. Any amin’ny varo-maizina no ahitana io ary tsy maintsy mividy izay mila. Vokatr’izany dia tafakatra Ar 17 000 ny saran-dalana mankany an-toerana raha toa ka Ar 15 000 izany teo aloha. Ankoatra ny halafon’ny vidin-tsolika dia mampiteny ny moana ny lalana mankany Vondrozo ary kamiao sy fiara tsy mataho-dalana sisa afaka makany. Tsy mba misy ireny taksiborosy Sprinter na Mazda ireny mankany fa fiara 4×4 no fitateram-bahoaka ka izay no tena mampidangana ny saran-dalana. Fiara tsy mataho-dalana miisa roa no mampifandray ity distrika ity amin’i Farafangana. Mampiseho ny tena fahantran’ny firenena malagasy ny zava-misy any Vondozo izay sady saro-dalana no marisarisa ihany koa amin’ny tsy fandriam-pahalemana sy ny asa fampandrosoana ankapobeny. Tsy mahatratra 50% akory ny tahan’ny fahafahana fanadinana Cepe ho an’ny sekolim-panjakana any an-toerana.

Tsy hitan’ny mpitondra izany nefa mba fantatr’izy ireo ihany angamba  fa ny hanamboatra lalana ho an’ny vahiny hanatrika ny fivoriamben’ny frankofonia ihany no mahamaika sy laharam-pahamehana ho an’ireo ao amin’ny antoko Hvm ao. Raha ny zava-misy dia hita fa tsy mbola mialohan’ny taona 2018 no hahavitan’ireo lalana tena ratsy rehetra eto Madagasikara. Saika mifantoka betsaka amin’ireo lalana handalovan’ny vahiny mpiara-miombon’antoka sy mpampiasa vola ary mpizahatany no laharam-pahamehan’ny fitondram-panjakana.

Dom