Nahoraka be teto an-drenivohitra omaly ny vaovao mahakasika ny fahatratrarana olona miisa 9 voalaza fa mpanaparitaka vanja fanaovana baomba vita tanana. Araka ny vaovao avy amin’ny polisy dia nahatrarana kapisily fanapoahana dinamita miisa 16 sy vovom-banja « nitrate » milanja 300 grama tao amin’ny lehilahy iray monina eny Ivato. Olona 8 hafa avy eo no voasambotra. Ahiahian’ny mpitandro filaminana ho mpiray tsikombakomba amin’ny fanamboarana sy fanapoahana baomba vita tanana ireto olona ireto. Raha ny fanazavan’ny mpikapo-bato anefa dia efa fanaon’ny mpitrandraka kariera madinika ny mividy vanja amin’ny olona mitondra izany mandehandeha. Raha ny fantatra dia tsy manana fahazoan-dalana hampiasa vanja ireo kariera madinika manodidina ny renivohitra ka efa misy mpanera izay mamoaka vanja antsokosoko any amin’ny trano fitehirizana izany mamatsy azy ireo. Mailo anefa ny mpitandro filaminana amin’izao tany mihotakotaka izao ka nalefa vonjimaika eny Tsiafahy ireo voarohirohy.