Miantso vonjy amin’ny fitondram-panjakana ny mpiompy osy any amin’ny afritra atsimon’ny Nosy noho ny tsy fahombiazan’ny fitantanana ity fiharian-karena tokony hiroborobo ity. Fantatrafa mahatratra telo hetsy sy iray tapitrisa ny osy ompiana any atsimo ary azo avadika ho loharanom-bola tsara io. Tsy misy anefa tosika sy tolo-tanana ho an’ny mpiompy mba ataon’ny mpitondra fanjakana ka lasa ny samy tambanivohitra ihany no mifampivarotra ny biby. Araka ny filazan’ny federasion’ny mpiompy osy anefa dia azo aondrana sy avadika vola vahiny hanetsehana ny fampandrosoana ny ara-toe-karena ity biby ity. Tsy very rahateo ny osy satria azo hanina ny henany sy ny rononony, azo atao karipetra ny volony ary azo atao poketra sy kiraro ny hodiny. Mitaky ny mpitondra handray andraikitra sy hitady lalam-barotra noho izany ireo mpiompy mba hahafahan’izy ireo mivelona sy mampandroso ny faritra misy azy. Raha misy ny lalam-barotra dia azo raisina ho fanoitran’ny asa fampandrosoana hisorohana ny fiverimberenan’ny tsy fahampian-tsakafo nohon’ny fahantrana ny fiompiana osy any Atsimo. Vonona ny hiasa sy hiezaka ireo mpiompy saingy mitady tosika avy amin’ny mpitondra izay mapanantena fa hiasa  ho an’ny vahoaka sy ny firenena izy ireo.

Dom