Maty kilan’ny afo ny ramatoa be 60 taona sy ny zafikeliny miisa roa izay 4 sy 10 taona monina any Mandoto Antsirabe. Nodoran’ny jiolahy velona tao an-trano izy ireo ary notondrahany lasantsy mihitsy talohan’ny nanipazany afokasoka mirehitra. Vatan-dehilahy am-polony no niditra tao amin’ilay trano ary nanery ilay renibe hamoaka ny vola rehetra. Nilaza ho tsy mitazona vola ity farany ka nasain’izy ireo nitondra azy tany amin’ny efitrano misy ny vatan-dehilahy.

Tsy nanaiky izany anefa ilay renim-pianakaviana ka natosik’ireo jiolahy tao amin’ny efitrano nisy ankizy natory. Norarahana lasantsy izy telo mianaka ary nodorana tao dia nakatona avy any ivelany ny varavarana. Nandrasan’ireo jiolahy tamin’ny basy teo ivelany mandra-pahafatin’izy telo mianaka voadoro tao anatiny. Tsy nisy sahy nivoaka nanavotra ny mpiara-monina satria natahotra ny tifitra variraraka nataon’ireo olon-dratsy. Araka ny vaovao voaray dia tsy nitondra entana na inona na inona ireo olon-dratsy fa lasa fotsiny rehefa nandoro velona ireo tsy manan-tsiny. Fantatra ihany koa fa nisy olona 3 hafa mipetraka ao amin’ilay trano naratra mafy sy may teo amin’ny lohany.

Manahy ny mponina any an-toerana fa mety misy ambadika hafa ankoatra ny fanafihan-jiolahy tsora ity tranga ity. Rehefa tsy nahita lehilahy tao an-trano mantsy ireo mpanafika dia ny zaza amam-behivavy no novonoiny ho faty. Mety misy resaka lonilony sy valifaty ary fialonana ny tranga toy izao. Ny fanadihadian’ny mpitandro filaminana ihany anefa no hahafantarana izay tena antony marina ka miandry izany ny vahoaka.

Dom