Tao Kiranomena no raikitra ny fifandonana tamin’ny dahalo sy ny fokonolona nampian’ny zandary tamin’ny fanarahan-dia mpangalatra omby. Resy tosika ireo malaso ary rifatra nanavotra aina saingy efa nahafaty lehilahy iray tamin’ireo fokonolona ry zareo. Ankilany kosa dahalo roa no lavon’ny mpanara-dia ka navelan’ny namany teo ny fatiny. Tafaverina amin’ny tompony ihany koa ireo omby miisa 100 efa teny am-pelatanan’ireo dahalo. Tany amin’ny faritra Melaky distrikan’i Morafenobe no nitrangan’ity asan-jiolahy nahafatesana olona 3 ity. Dahalo valolahy no nanafika tao amin’ny fokontany Bekininina, kaominina Andranokoaky ny 21 jolay lasa teo. Nitondra basim-borona miisa 4 ireo mpangalatra ka tsy nisy sahy nihetsika ny tao an-tanàna ka nanaram-po ireo olon-dratsy. Rehefa lasa lavidavitra nandroaka ny omby 100 ireo malaso vao nifampivondrona ny fokonolona sady efa tonga rahateo ny zandary avy ao Ankoaky ka raikitra ny fanarahan-dia. Raikitra ny fifandonana rehefa tratra teny an-dalana ireo dahalo ka io voalaza eo ambony io no vokatr’izany. Manohy ny famotorana kosa ny zandary mba hahafahana mamantatra sy misambotra ireo mpangalatr’omby enin-dahy tafaporitsaka taorian’ny fifandonana.

Dom