Omby roa tamin’ireo 25 nangalariny no novonoin’ny dahalo teny an-dalana. Nohaniny ny ampahany ary navelany teo ny ambiny. Tany amin’ny fokontany Ampotaka kaominina Mahatsinjo Maevatanàna no nitrangan’io halatr’omby io. Dahalo miisa 8 izy ireo no nanafika mpiompy iray ary omby miisa 25 no lasa tamin’izany, ny 23 jolay lasa teo. Hafa kely ny fitrangan’ny fanafihana satria tsy nahery setra ireo mpangalatra fa naka an-tsokosoko ary lasa mangingina. Efa nanjavona ny omby rehetra vao taitra ny tompony. Tamin’izay vao nanapa-kevitra ny hitady ny fananany. Tamin’izany vao fantatra fa lasan’ny dahalo ireo omby rehetra. Nantsoina ny fokonolona sy ny miaramila ary nokarakaraina ny fanarahan-dia. Nahay nandositra anefa ireo dahalo ary tsy hita popoka izay nalehany niaraka tamin’ny omby miisa 20. Ny omby 2 kosa novonoin-dry zareo teny an-dalana ary omby 3 hafa navelany velona teo ka tafaverina tamin’ny tompony. Efa niditra an-tsehatra ihany koa ny zandary avy ao amin’ny borigadin’Andriba hanamafy ny fanarahan-dia sy ny fikarohana ireo mpangalatr’omby ireo.

Dom