Telolahy nirongo kibay no nanakan-dalana vehivavy 4 hamonjy tsena any Antanimbary Maevatanàna ka nandroba azy ireo. Ankevitry ny efa fantatr’ireo jiolahy mihitsy fa mitondra harem-be ireo andriambavilanitra notafihiny ireo. Vola mitentina 1 hetsy sy 20 tapitrisa Ariary miampy vovom-bolamena 7 grama ary firavaka volamena toy ny kavina, peratra ary rojo fanao eny amin’ny tanana no lasan’izy ireo tamin’izany. Raha izao tranga izao dia karazan’ireny mpibizina volamena ireny izy 4 mirahavavy ka nitetika ny hampitombo vola tao amin’ny tsenan’Antanimbary nefa izao nifanehitra tamin’ny olon-dratsy izao. Raha ny fanazavan’izy ireo dia nirifatra nianatsimo ireo mpandroba, izany hoe nihazo an’ankazobe iny rehefa nahazo izay nilainy. Efa nanao ny fanarahan-dia sy ny famotorana rehetra ny zandary saingy mbola tsy nisy ny tatitra mahakasika ny vokatr’izany. Ny hany fantatra dia ny firongatry ny asan-jiolahy any Maevatanàna noho ny bizina volamena antsokosoko izay tena mahazo laka. Mifanaraka any ambadika any ny mpivarotra sy ny mpividy volamena ka izy ireo ihany avy eo no mifandefa jiolahy handroba hoy ny tompon’andraikitra iray any an-toerana.

Dom