Maty tsy tra-drano ny lehilahy lehibe efa 68 taona rehefa nilatsaka tao ambany tetezana any Ampasika Mangamila. Nandeha kamiao izy tamin’io fotoana io ary nisy olana ara-tekinika ilay fiarabe ka najanon’ny mpamily teo ambony tetezana mba hijerena ny zava-misy sy hanamboarana izany. Tsy nijanona tao anaty kamiao anefa ilay mpandeha izay efa mamo fa nivoaka ihany koa ka tonga dia nilatsaka tao ambany tetezana. Ratsy fianjerana izy satria ny lohany no nandeha aloha ary ny fihirifany mihitsy no notsenain’ny vato. Mafy ny fianjerana ka namoy ny ainy teo noho eo ilay rangahy. Efa manao ny famotorana ny zandary avy ao Mangamila mba hanaporofoana marina raha tena nianjera noho ny loza tsy nampoizina tokoa ilay rangahy na sanatria niniana natsipy na natosika mba ho faty tao ambany tetezana tao. Mahagaga ihany mantsy ary tena voararan’ny lalàna tanteraka izany hoe manajanona fiara ao anaty tetezana izany, na inona na inona antony. Ny valin’ny fanadihadiana no hamantarana izay tena zava-nitranga marina amin’ity raharaha nahafaty olona ity.

Dom