Tapa-tanana ny mpitondra môtô iray nidoboka teny amin’ny sampanan-dalan’Ambanidia omaly. Raha ny fitantaran’ireo nanatri-maso dia nodomin’ny môtô iray hafa avy ao aoriana izy raha iny nitsoriaka handeha maika iny satria nahazo lalana. Mpiara-miasa ihany koa ireo mpifandona ireo ary efa zatra miara-dalana saingy tsy fitandremana kely vokatry ny hamaikana no niteraka ny loza. Nentina tany amin’ny hopitaly haingana ilay naratra satria nahitana fivontosana ny tanany. Karazan’ny nisy taolana vaky tao rehefa notarafina tamin’ny fitaovana manokana momba  izany. Naneho indray ity tranga omaly ity fa tena fitaovam-pitaterana mampidi-doza ny môtô. Tsy ireo jiolahim-boto sy ny mamolava ihany no maratra sy maty amin’ireny fiarakodia kodiaran-droa ireny fa na dia ireo olona matotra sy mitandrina tsara aza dia lasibatra  ihany koa, toy ny nahazo ity ranamana ity. Saika ho isan’andro dia misy olona adoboky ny môtô foana eto an-drenivohitra. Tsy misy fitsirihana teknika rahateo ireny fitaovam-pitaterana ireny ka izay ihany koa no tena mahatonga ny loza.