Zazavavy miisa 3 manodidina ny 14 taona avokoa no maty natelin’ny rano teny Ambatofotsy gara ny tolakandron’ny zoma lasa teo. Raha ny tatitry ny zandary dia mpihavana akaiky izy ireo satria zanak’olona mpiray tampo avokoa. Nilomano teo amin’ny reniranon’i Sisaony, tokony ho 200 metatra miala ny tetezan’Ambatofotsy gara ireo zaza ireo izao tra-doza izao. Efa nisy an’ireo mpaka fasika mandeha lakana ihany  nampitandrina azy ireo fa misy lavaka lalina eo amin’io faritra io noho ny nanaovana biriky tamin’ny maintany tamin’ny taona lasa. Ireo ankizy moa efa zatra nilalao teo ihany ka tsy nanana tahotra loatra ary niroso hatrany. Nitranga tokoa ny nampoizina satria latsaka tao anatin’ilay lava-pasika izy telovavy ary tsy nisy olona sahy niroboka  nanavotra azy ireo fa nitazana sy nikiakiaka eny amoron-drano fotsiny ny rehetra. nantsoina ny pompier avy any Antananarivo ka tamin’ny 3 ora no tonga tany an-toerana. Antsasak’adiny taorian’ny fikarohana vao hita ny voalohany ka efa maty. Folo minitra taorian’izay koa dia hit any fatin’ireo zaza roa hafa. Azo lazaina fa tena loza mitatao ho an’ny fiaraha-monina mihitsy ny lava-pasika sy lava-biriky atao anaty renirano rehefa maintany.