Tifitra akaiky dia akaiky no nahavoa ka nahafaty an-dramatoa vadin’ny ben’ny tanànan’i Tanambe teo aloha raha iny teo an-dalam-podiana iny izy mianakavy ny faramparan’ny herinandro lasa teo. Somary efa harivariva ny andro tamin’io ary efa nanakaiky ny toeram-ponenany no nitrangan’ny loza. Tsy dia nahatsikaritra loatra ny zava-nisy ireo olona niara-dalana taminy tamin’io fotoana io raha efa tsy nahita ilay ramatoa nitolefika tamin’ny tany niampy ny ra nijininika. Marihina ihany fa avy any aoriana no tafavoaka teo aloha ilay bala nahalavo ity renim-pianakaviana ity. Niakatra ny hatezeran’ireo fokonolona mahakasika izao zava-nitranga izao ary nanamafy fa tsy hamela moramora foana sy hanao izay hahatratrarana ny nahavanon-doza. Efa mandeha ny fanadihadiana rehetra mahakasika ity fitifirana ity. Hentitra ihany koa ny fanaraha-maso ny fivezivezena ao Tanambe izay ataon’ny mpitandro filaminana.

Ange R.