Nitrangana lozam-pifamoivoizana tao amin’ny fokontany Antanifotsy kaominina Ambatondrazaka renivohitra ny alahady faha-14 aogositra 2016 lasa teo. Zazakely vao 08 taona monja no maty tsy tra-drano voahitsaky ny fiara tsy mataho-dalana iray. Ankizy tsy ampy taona nangalatra nitondra fiara no voalaza fa nandona ity zaza ity ka nahatonga izao voina lehibe izao. Nipetraka niaraka tamin’ny namany izy io hoy ny mponina no nandalo ity fiara ity izay efa nivilavila ka nifatratra tany aminy. Nitsoaka avy hatrany kosa iretsy sasany. Ny loharanom-baovao ihany koa no nahafantarana fa tsy tao an-trano ny olon-dehibe. Nohararaotin’ilay tovolahy izany ka nalainy ny fanalahidy nihantona teo amin’ny toerany mba hitondrany ilay fiara. Efa noraisin’ny mpitandro filaminana ny raharaha rehetra amin’izao fotoana izao. Na ny ray aman-drenin’ny niharam-boina na ny an’ilay nandona dia samy sosoa voatapo-drano avokoa nanoloana ity loza niseho tao Antanifotsy ity.

Ange R.