Tany Miadana Miarinarivo II no nitrangan’ity loza namoizana ain’olona ity. Mpinamana ihany no nifamono rehefa tsy nitovy hevitra satria nanao resaky ny mamo. Nandray ny antsy nandidiana tsaky ny iray ka notsatohany tamin’io ilay namany. Tsy nihevitra  ny hamono mahafaty anef izy satria ny teo amin’ny fen’ilay iray no notsindrominy. Rehefa ho avy ny loza dia patsa iray tsy omby vava satria nahazo lalan-dra vaventy ilay zava-maranitra ka niboiboika ny rà. Nentina haingana tany amin’ny hopitaly ilay naratra saingy nohon’ny fahaverezan-drà be loatra dia tsy tana ny ainy. Efa nosamborin’ny zandary ilay nahavanon-doza ary nomena ny fianakaviany ny razana. Tsy nananosarotra ny fisamborana satria tao an-tranon’ny anabavin’ilay namoy ny ainy no nitranga ny herisetra. Raha ny fijery azy dia tena efa andro miditra mihitsy ity faty olona ity satria tsy hisy nanam-po hoe hiafara amin’ny tsatok’antsy ny fiaraha-misotrosotro teo amin’izy roalahy. Mbola manaporofo ny voka-dratsin’ny tsy fahafehezan-tena noho ny toaka ihany koa anefa satria raha ranom-boankazo no niarahany niala hetaheta mety tsy niafara tamin’ny ady sy ny fifamonoana toy izao izany.