Misahotakotaka ny ao amin’ny sekoly tsy miankina iray any Bezaha noho ny fisolokiana ataon’ny lehilahy kaomorianina iray izay mpampianatra ao ihany. Tangosan’ity teratany vahiny ity volabe mantsy ny ray aman-drenin’ny mpianatra nefa tsy hita akory izay vokatra azo amin’izany. Efa nanao fitoriana ireo lasibatra satria mahatratra amin’ny hetsiny no efa  nakepok’ilay kaomorianina. Miandry ny fandraisan’andraikitr’ireo manam-pahefana ny vahoaka satria mahatsapa tena ho voafitaka amin’izao fotoana efa mananosarotra amin’ny fampidirana mpianatra  izao. Fanirian’ireo voasoloky ny hamerenana ny volan’izy ireo sy androahana ilay teratany vahiny ao amin’ilay sekoly ary ny fanalan’azy ao an-tanàna mihitsy. Araka ny averimberin’ny mpitondra fanjakana matetika mantsy dia vahiny mpandraharaha sy mpampiasa vola no ilain’i Madagasikara fa tsy olona mpisoloky sy hitsentsitra ny malagasy. Andrasana izay ho tohin’ity raharaha ity sy ny fanazavana mety ho entin’ilay kaomorianina voarohirohy amin’ny asa fisolokiana.

Dom