Dahalo 10 lahy nirongo basim-borona no indray nanafika ny ben’ny tanànan’i Betsipolotra any amin’ny distrikan’i Miandrivazo. Lasa tamin’izany ny omby miisa 20 ka nanao ny fanarahan-dia avy hatrany ny fokonolona sy ny zandary. Ny ampitson’ny fanafihana dia tratra tao amin’ny fokontany Befotaka kaominina Itondy ireo mpanafika nefa tsy nanaiky nolembenana fa avy hatrany dia nanao tifitra variraraka. Raikitra ny fifandonana teo amin’ny roa tonta ka voatifitra ny zandary iray miasa ao Betsipolotra.

Teo amin’ny lohaliny havanana no niantefan’ny bala ka tsy tafatsangana izy ary voatery nentina niverina ka nalefa any amin’ny hopitalin’Ankavandra. Tafaporitsaka niaraka tamin’ny omby nangalariny ireo dahalo nefa tsy nanaiky nolembenana ny mpanara-dia fa nitohy ihany ny fanenjehana. Nandray andraikitra rahateo ny zandary avy ao Itondy ka nandefa mpitandro filaminana miisa 16 hanampy tosika ireo efa miaraka amin’ny fokonolona. Mbola tsy fantatra kosa ny tohin’ny fanarahan-dia nataon’izy ireo.

Dom